FANDRIAM-PAHALEMANA : Miaramila 80 lahy hampandry tany any Menabe

Iaraha-mahalala fa ikoizana amin’ny asan-dahalo mahery vaika an-taonany maro  ny Faritra Menabe iny.  6 décembre 2018

Manao sesilany ny fandrobana mitam-piadiana izay miitatra hatrany amin’ny  fakana an-keriny  mahazo laka amin’izao fotoana, izay fitaovana  fakàna vola an-tapitrisany ataon’ireo tambazotrana jiolahy. Manginy fotsiny ny aina nafoy  sy maratra ary faheverezana  fananana noho ny fanjakazakana ataon’ireo olon-dratsy. Azo lazaina hatreto fa ny Faritra Menabe no tena lasibatra indrindra  amin’ny lafiny tsy fandriam-pahalemana eto Madagasikara raha tamin’ity taona ity no  asian-teny. Manoloana izany indrindra dia  nanatanteraka hetsika  goavana natao hiadiana sy hiaroavana ny mponina ireo tompon’ andraikitra mivondrona ao amin’ny «  ONG Fanamby  ».

Amin’ny alalan’ny fandefasana mpitandro filaminana mahatratra hatrany amin’ny 80 lahy hampandry tany no nanehoan’izy ireo ny fahavononany hanafoana ny asan-dahalo. Ity vondrona ity avokoa no miantoka ny lany rehetra ary miara-miasa akaiky amin’ireto miaramila hanatanteraka ny fisafoana. Fantatra tamin’ny loharanom-baovao voaray avy any an-toerana hatrany ary fa «  nanomboka omaly no  niatrika hetsika voalohany ireto mpitandro filaminana ireto ka tsy hifarana izany  raha tsy tapitra ny folo andro  ». Zavatra maro loko be dia be no  hataon’ireto savahao  any amin’iny faritra iny, isany  hanatratrarana tanjona lehibe ny  fanafoanana tanteraka ny asan-dahalo mahery vaika, miampy ny  fanaovana «  kidnapping  » manao sesilany ankehitriny.

 Mahavelom-bolo ny fokonolona ny  fandraisan’andraikitra  ohatran’izao ary manantena sahady izy  ireo fa hisy vokany goavana  ny fandraisana andraikitra. Miaina ao anaty tebiteby fatratra loatra mantsy ny mponina ka ilaina dia ilaina ny fijerevana ifotony ny zavatra tahaka izao mba hitadiavam-bahaolana . Arahina akaiky araka  izany ny  fizotran’ny  asan’ireo mpampandry tany  any  amin’ity faritra ity .

Tatianà R.