Webradio

FANATANTERAHANA NY VELIRANO : Nidina ifotony nijery ny fanamboarana ny Kianja Barea ny Filoham-pirenena

Rehefa avy nitsidika ny Rovan’Antananarivo dia nanao fitsidihana ifotony nijery ny asa fanamboarana ny Kianja Barea etsy Mahamasina indray ny Filoha Andry Rajoelina sy ny Minisitry ny Fanatanjahantena ary ny ben’ny tanànan’Antananarivo. 18 février 2020

Ireto tetikasa goavana roa ireto dia anisan’ireo tetikasa hanamarika izao dimy taona voalohany itondrany izao satria dia tafiditra ao anatin’ireo velirano natao hampiroboroboana ny tanora sy ny fanatanjahantena sy hanandratana ny kolontsaina malagasy ihany koa.

Tetikasa goavana,  mitovy lenta tamin’ny nanamboaran’ny Filoha Andry Rajoelina ny lapan’ny tanànan’Antananarivo nandritra ny vanim-potoanan’ny tetezamita ireo tetikasa ireo. Mizotra araka ny tokony ho izy ny asa etsy Mahamasina. Nanamarika moa ireo tompon’andraikitry ny orinasa sinoa «  China State Construction Overseas Development  » (CSCOD) izay misahana ny fanatanterahana ity tetikasa goavana ity fa ho voahaja araka ny tokony ho izy ny fe-potoana izay nifanarahana. Izany hoe ho vita soa aman-tsara alohan’ny faha-26 ny volana jona, izay hankalazana ny faha-60 taona nahazoana ny fahaleovan-tena ny tapany voalohany amin’ny tetikasa fanamboarana ny Kianja Barea. Ny tapany voalohany moa dia ny fanamboarana ny «  tribune  » izay haka endrika Ravinala ka hisy toerana miisa 16 000 eo ho eo.

Hojerena ny fitandronana ny ain’ny mpijery

Raha tsiahivina dia miisa 40 880 ny toerana hisy eo amin’ny Kianja vaovao etsy Mahamasina. Hojerena manokana amin’izao fanavaozana goavana atao izao ny fitandrovana ny ain’ny mpijery baolina ary hisy ny fepetra horaisina mifanaraka amin’izany. Izany no natao dia hialana amin’ny fifanosehana eo am-pidirana sy eo am-pivoahana mba tsy hiverina intsony ny tranga niseho nandritra ny fihaonana teo amin’i Barea sy Sénégal, ny volana septambra 2018 sy tamin’ny fankalazana ny fetin’ny fahaleovan-tena ny 26 jona 2019 izay nahafatesana olona am-polony sy nandratrana olona an-jatony. Miisa 6 ireo vavahady fidirana amin’ny kianja vaovao ary 28 kosa ny totohatra fidirana eny amin’ny «  gradins  », ankoatra ireo ny fidirana natokana ho an’ny «  VIP  » sy ny «  staff  ».

Hanaraka ny fenitra iraisam-pirenena

Raha 3 monja ny toeram-pivoahana misy etsy Mahamasina ankehitriny dia  hahatratra 50 izany rehefa vita ny asa. Araka ny fanazavana hatrany dia hisy toerana fiantsonan’ny fiara na «  parking  » mahazaka fiara 115 sy toerana fametrahana fiara goavana miisa 4 ao anatin’ny Kianja Barea. Toa ireo kianja goavana any ivelany dia hisy magazay sy toeram-pivarotana maro isan-karazany hahitana akanjo sy lamaody ary taozavatra malagasy ao ambanin’ ny «  tribune  ». Mikasika ny «  pelouse  » indray dia bozaka «  hybride  » hafarana manokana no hampiasaina ary ho maoderina ny fikojakojana azy satria hisy an’ ireny «  arrosage automatique  » ireny. Ankehitriny dia efa vita tanteraka ny asa fandravana ny «  tribunes  » teo aloha ka efa miroso amin’ny fijerena ireo pitsopitsony amin’ny fananganana ny fototra ireo teknisiana.

Ny fototra no tena antoky ny hamafisan’ny kianja, hoy ny tompon’andraikitry ny orinasa CSCOD, ka io no mila tandrovana tsara. Raha ny fanazavana moa dia hilentika lalina dia lalina tokoa, mety ho 30m any ambanin’ny tany izany fototra izany. Marihina moa fa ity orinasa CSCOD ity no niantoka ny fanamboarana ny foiben-toeran’ny Vondrona Afrikana, izay raitra dia raitra tokoa ka nanamafy tamin’ ireo tompon’andraikitry ny orinasa ny Filoha Andry Rajoelina nandritra ity fidinana ifotony tetsy Mahamasina ity ny mba hanaraka izany fenitra izany ny fanamboarana ny Kianja Barea, izay hipetraka amin’ny tantara ary holovain’ireo taranaka fara mandimby.

Ny Fanoratana

modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message
  • Pour créer des paragraphes, laissez simplement des lignes vides.


Design et réalisation: VizEcho Media Copyright © Ino Vaovao.COM SA - octobre 2009 . Reproduction interdite - Tous droits reservés