LOZAM-PIFAMOIVOIZANA NISESY : Tafakatra 04 ireo maty, saika mpitondra moto avokoa

Nirongatra  ny  lozam-pifamoivoizana niseho  teto  an-drenivohitra  Antananarivo,  ny  faran’ny  herinandro teo iny.  2 novembre 2020

Saika   ireo  kodiaran-droa  na  ny  moto   avokoa  no  niharan-doza   ary nahafatesan’olona  mihitsy,  toy  ny tranga  niseho  teny   Ankadindramamy, Ambohitrimanjaka ary  koa  ny teny Talatamaty  Imerinafovoany. Raha  ny  loharanom-baovao, miisa efatra  eo ireo  olona  namoy  ny ainy tamin’ny  loza   miisa telo  samihafa. Ny  zoma  30 oktobra, teny  Ankadindramamy  manakaiky ny  vatosoa  dia  moto  iray  no  nifandona tamin’ny  fiara  “sprinter” tao  anaty  fiolanana, tokony  ho  tamin’ny  11  ora  alina tany  ho  any.

Raha  ny   tatitra  voaray  dia  voalaza fa takon’ilay  dabam-pako  ny  mpamily  fiara  ka  avy  hatrany  dia  nifatratra  tany  amin’ilay  moto. Vokany, lehilahy   iray  no maty  tsy tra-drano, ny  vehivavy  iray  hafa  niaraka  taminy  kosa  naratra  mafy  ary  nifamonjena  haingaka noentina  tany  amin’ny  hopitaly HJRA  saingy  tsy  tana  ihany  koa  ny  ainy. Samy  nindaosin’ny fahafatesana   daholo noho izany izy  roa ireo. Ny  takarivan’ny  Sabotsy  ihany  koa, lehilahy  iray   nitondra  moto  teny  Ambohitrimanjaka  koa  no  maty  nindaosin’ny  fahafatesana,  raha toa  ka voa  mafy  teo  amin’ny  lohany.

Ary  ny tranga  niseho  teny  Talatamaty,  omaly  alahady  indray  dia fantatra  fa  nisy  taksibe  miisa roa  nifanenjika raha  ny fanazavana  voaray  avy  amin’ireo  nahita maso  ny raharaha.  Vokany,  voafaoka tamin’izany  ny  moto  iray  nanao taingin-droa noho ny  fifanenjehana  mafy  teo  amin’ireo  fiara. Vehivavy  iray  noentina  avy ao  afara tami’ity  moto  voadona  no  maty  teo noho  eo  ihany. Nahenoana  fofona  alikaola  ireo  mpamily  ireo  raha  ny  tatitra  voaray  hatrany. Raha  ny  zava-misy  aloha  eto  dia ireo mpitondra moto   no  niharan-doza nifanesisesy. Efa mila  ho  isan’andro ka  tokony  handraisana  fepetra   hentitra ny fampiasana ity   fitaovam-pitaterana  iray  ity, hoy ireo olona nanaovana fanadihadiana indrindra  ny  eto  Antananarivo. Efa  be  loatra  ny  manana azy  kanefa  dia  toa  betsaka ny tsy mahafehy ny  lalàna mifehy  ny  fifamoivoizana.

Tatianà R.