Webradio

MIANDRIVAZO : Niditra an-tsehatra ny Zandary, dahalo miisa 03 lavon’ny bala, 03 hafa naratra

Asan-dahalo mahery  vaika  nahafatesan’olona  nifanesisesy  no  niseho  tao  Ambatomanga, Kaominina Akondromena, Distrikan’i Miandrivazo nanomboka  ny  alatsinainy  faha  30  novambra  ka  hatramin’ny  talata faha -08  desambra lasa teo iny.  10 décembre 2020

Ny  tatitra  avy  eo  anivon’ny  Zandary  no nahalalana fa fifandonana  mafy  intelo  miantoana  no  nisy  teo  amin’ny  andian-dahalo  marobe sy ny  Zandary  tao  an-toerana nanatanteraka  ny  asany. Ny  vokatra  lehibe  vitan’ny  zandary  nandritra ny  fiarovana ny vahoaka  sy  ny  fananany  aloha tamin’io  fotoana io  dia   sarona  ireo  omby  halatra  novonoina, dahalo  miisa telo  lavon’ny  bala, telo  hafa kosa naratra  mafy. 

Araka  ny  fanazavana voaray, ny  alatsinainy  30 novambra  no  fantatra fa  saron’ny tompony  tao  Akondromena  ny  omby  iray  izay  nisy  nangalatra  nefa  namidy,  lasa nitsoaka  avy  hatrany  ilay olona nanao  izany, fantatra  fa avy  ao  Ambalamanga. Tsy  nijanona  teo  ny  zava-nitranga fa ny  02  desambra  maraina  tokony  ho  tamin’ny  dimy  ora   tao  amin’ny  fokontanin’i Mokotra  dia  andian-dahalo  manodidina  ny telopolo  lahy  tany  ho  any  no tonga  namono tamin’ny  fomba  mahatsiravina   ireo  mpiandry  omby  miisa roa. Voamarika  fa mpiandry  ombin’ilay tompon’omby   tratra  tany  an-tsena izy io. Niditra  an-tsehatra  tamin’io tranga io  moa ny  Zandary sy  ny Tafika  Malagasy  avy ao  Akondromena   rehefa  nahazo  fitarainana ka  ny  08  desambra  teo  no  nandeha nisambotra  ireo  dahalo  nahafaty  azy  roa lahy. 

Nanomboka  teo  no  niatomboka  ny fifandonana mafy, satria  nisy  dahalo  miisa  roa  nitazana ireto  mpitandro  filaminana avy tao Ambalamanga  ary tonga  dia    nitifitra  tamin’ny  basimborona. Niaro-tena  sy  namaly  ihany  koa  ny Zandary  ka  rehefa  tafiditra  tao  amin’ny  tanànan’ Ambalamanga  ireto  mpitandro  filaminana  dia  nihabetsaka  sy  nanampy  namana  ireo  dahalo. Teo no   nahalavo  ny  jiolahy  telo   sy  namparatra  ny  telo  hafa. Nilavo  lefona  ihany ny farany  ireo olon-dratsy  ka  nitsoaka  niaro tena. Nandritra  ny  fisavana  ny tanànan’izy  ireo  kosa dia  nahitana  kitoza be dia be  sy  hoditr’omby  mitondra  ny  marik’ilay  mpampiasa ireo  mpiandry  omby  namoy  ny  ainy  tany  aloha. Hatreto, mbola tsy  tena  miverina  amin’ny  laoniny  ny filaminana raha toa  ka  mbola  mikononkonona  valifaty indray  ireo  dahalo. Na izany aza anefa  dia efa mivonona tanteraka  ny Zandary  sy  Tafika miasa ao  an-toerana  hifanandrina  amin’ireo  malaso.

Tatianà R.

modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message
  • Pour créer des paragraphes, laissez simplement des lignes vides.


Design et réalisation: VizEcho Media Copyright © Ino Vaovao.COM SA - octobre 2009 . Reproduction interdite - Tous droits reservés