NAMONTANA - ANTANANARIVO IV : Sarona ireo olon-dratsy 03 mpamatsy fitaovam-piadiana jiolahy

Ny  08  desambra lasa teo, lehilahy  iray  sy  vehivavy  miisa roa  mpivarotra  fitaovam-piadiana  no  tra-tehaky ny zandary  teny  amin”’ny  “Boulevard de  l’Europe” Namontana  eto  Antananarivo.  10 décembre 2020

Tratra  niaraka  tamin’ny  basy  vita tanana  ihany  koa  izy  ireo tamin’io  fotoana io. Tatitra marim-pototra   avy  tamin’ny olona tsara  sitrapo teny  amin’ny  manodidina  no  niaingana  nanaovana  ny  famotorana.  Fantatra  tamin’izany  fa  misy  andian’olona  mpamatsy   fitaovam-piadiana  an’ireo  jiolahy  mpanafika  eto  Antananarivo  sy  ny  manodidina. 

Raha vao  naheno ny  raharaha  moa  ny  Sampana  mpikaroka  ny  heloka  bevava  eo anivon’ny  Zandarimariam-pirenena  Antananarivo  dia  nidina ifotony, nanokatra  ny  famotorana  lalina  teny  Namontana. Sarona teny  tokoa izy ireo, niaraka  tamin’ireo  basy  poleta vita tanana  miisa roa tsy  misy  laharana. Voaporofo  nandritra  ny fanadihadiana  natao  azy  ireo  fa efa  mpamerin-keloka  ary  niaiky  ny  heloka vitany  izy ireo,  ny iray  monina  eny  Manakambahiny, ny  iray  Tsiadana  ary  iray  eny  Madera Namontana. 

Manentana  ny  mponina  hatrany moa  ny  mpitandro  filaminana ny  amin’ny  fanomezam-baovao  azy  ireo haingana   raha sendra  misy  zavatra  mampiahiahy  eny  anivon’ny  fiarahamonina. Isany  mampirongatra ny  fanafihana  mahery  vaika eto  Antananarivo   hatrany  mantsy  ny  fiparitahana fitaovam-piadiana.

Tatianà R.