Webradio

AMBOASARY ATSIMO : Mirongatra ny fanafihan-jiolahy sy fampihorohoroana

Manjaka indray  ny   fanafihana  mitam-piadiana  sy  tsy  fandriam-pahalemana  ao  anatin’ny  Distrikan’Amboasary Atsimo.  24 janvier 2023

Mirongatra  ny  fanafihana tokantrano.  Isan’andro  ireo  mponina  no  tonga  mitaraina eny  amin’ny  biraon’ny  Polisy manoloana ny  tranga  mahazo  azy  ireo. 

Raha  ny  loharanom-baovao  voaray  avy  eo anivon’ny  Polisim-pirenena  any  an-toerana,  tamin’ity  herinandro  ity dia nanomboka  ny  volana Desambra  2022 no nahazo  vahana  ny fanafihana mitam-piadiana izay  mitohy  hatramin’izao. Mangataka ny fandraisan’andraikitra hentitra avy amin’ny mpitondra Fanjakana sy ny mpitandro filaminana noho  izany ireo  mponina  satria  lasibatra  tsikelikely ny fananan’ izy  ireo ary tena misy ny mamoy havana. Vaky  trano sy  vono  olona ary fampihorohoroana  no  manjaka  ao a-toerana.  

Eo  anatrehan’ny  fitarainana voaray  dia  manambara   ihany  koa ireo mpitandro filaminana  miadidy ny ao  amin’ny  Faritra  fa efa  manatanteraka  izay  tandrify  azy  izy ireo, amin’ny fanaovana  hazalambo ireo  olon-dratsy. Koa miangavy  fiaraha-miasa matotra  avy amin’ny  fokonolona  mba  hahazoana  vokatra haingana. Araka ny loharanom-baovao  azo  tamin’ity  herinandro ity àry dia  fantatra  fa  jiolahy  miiisa  enina  no voasambotra  tao Bevala Amboasary  Atsimo,  ny  alinn’ny alatsinainy hifoha  talata  17 janoary  2023 lasa teo iny. Tompon’antoka  tamin’ny  fandrobana  fivarotana lehibe iray tao an-toerana ireo olon-dratsy   ireo.

Mpampihorohoro miaraka amin’ny fitaovam-piadiana

Lehilahy miisa 06 no voasambotry ny Polisy miasa ao  Amboasary ny 17 janoary 2023 tany Bevala Amboasary noho ny resaka fanafihana mitam-piadiana. Ny 17 janoary 2023, tokony ho tamin’ny 12ora sy 05 minitra alina no  voalaza  fa  nitrangana fanafihana mitam-piadiana tao amin’ny fokontany Tanambe, Kaominina  Ambonivohitra  Amboasary Atsimo. Magazay iray  lehibe mpivarotra kojakoja mahakasika bisikileta no notafihan’ireto olon-dratsy ary basy vita gasy no nampiasain’izy ireo tamin’izany ka kojakoja mahakasika ny  bisikileta maro no voaroba tao. Vaky nandositra ireto olon-dratsy raha vao  vita  ny  asa ratsiny  saingy   ireo  olona tsy lavitra teo no nampandre  avy  hatrany ny Polisy ka dia raikitra ny fifanenjehana io  alina  io  ihany.  Vokany, tra-tehaka  tany amin’ny Fokontany Bevala Galois ireo  lehilahy  miisa 05 raha tafatsoaka kosa ny lehilahy iray. Nentina avy hatrany tany amin’ny biraon’ny mpitandro filaminana ireto farany nanaovana fanadihadiana ka nanonona ny toerana mety hahitana ilay naman’izy ireo. Voasambotra tany amin’ny fokontany Ankamena  araka  izany ny naman’izy ireo iray. Hatreto dia  mbola mitohy ny fanadihadiana mahakasika izao raharaha izao. Marihana   mantsy fa   mitombo isa isan’andro ireo olona lasibatra  amin’ny  fanafihana  ao  an-toerana.

Tokony  ho hamafisina  indray  ny  fampandrian-tany

Eo  anatrehan’ny  tsy  fandriam-pahalemana  any  amin’ny  Faritra  Atsimon’ny  Nosy  iny  tato  ho  ato  dia   mangetaheta ireo fokonolona ny  amin’ny  tokony hanamafisana indray  ny  fampandrian-tany, fanaparitahana Polisy  sy Zandary   mivezivezy any  amin’ireo Faritra  tena ahitana  fanafihana mitam-piadiana mahery vaika.   Na efa  mametraka  ezaka  aza ireo  mpitandro filaminana,  hoy ny  mponina,  dia  mbola  hita  fa marefo  ny sehatry ny  fandriam-pahalemana ao  an-toerana   hatramin’ny  taon-dasa iny.  Ny  fampiasan’ireo  andian-jiolahy  fitaovam-piadiana  mahery  vaika  sy  ny  fahasahiana  mandatsaka aina  avy  hatrany mantsy no tena mampihoron-koditra ireto  farany. Raha   tsiahivina   ny  tranga  niseho  ny  volana  Novambra 2022, lehilahy   iray  nonina  tao  Beteza, Kaominina  Fotadrevo  Ampanihy  Andrefana no voatifitry ny jiolahy tao  amin’ny  hatony ka maty. Taorin’izay fitifirana izany vao nanao ny asa ratsiny ireo olon-dratsy. Araka izany, manao  antso avo ny vahoaka an-toerana  ny  amin’ny  tokony  handraisana  fanapahan-kevitra  hentitra manoloana izao firongatry ny asan-jiolahy izao.

 Tatianà R.

modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message
  • Pour créer des paragraphes, laissez simplement des lignes vides.


Design et réalisation: VizEcho Media Copyright © Ino Vaovao.COM SA - octobre 2009 . Reproduction interdite - Tous droits reservés